जोधपूर | राजस्थानच्या जोधपूर येथे शनिवारी मोठी दुर्घटना घडली. मंगरा पूंजला या परिसरातील रिहायशी कॉलनीमध्ये एका घरात अचानक तीन-चार सिलेंडरचा स्फोट (Cylinder Blast) झाला. यामध्ये चौघांचा होरपळून मृत्यू झाला. तर 16 जण जखमी झाले आहेत. गॅस लीक झाल्याचे पाहण्यासाठी माचिसची काडी पेटवली असता हा स्फोट झाला. या घटनेनंतर परिसरात एकच खळबळ उडाली.
जोधपूरच्या किर्तीनगर येथे बेकायदेशीर सिलेंडरचा व्यापार चालत होता. त्यावेळी सिलेंडरमधून गॅस लीक झाल्याचा संशय आला. हेच तपासण्यासाठी माचिसची काडी पेटवण्यात आली होती. नेमकं त्याचवेळी सिलेंडरने पेट घेतला. त्यानंतर तिथं असलेल्या 4 सिलेंडरचा स्फोट झाला. हा स्फोट इतका भीषण होता की, संकली गल्लीत रस्त्यावर असणारे लोक आगीच्या भक्ष्यस्थानी होते. यामध्ये 16 लोक बाधित झाले होते. या घटनेनंतर जखमींना तातडीने नयापुरा रुग्णालय आणि त्यानंतर एमजीएच येथे दाखल करण्यात आले.
यादरम्यान चार स्फोट झाले. त्यामुळे या ठिकाणी मोठी आग लागली होती. ही आग आटोक्यात आणण्यासाठी अग्निशमन दलाच्या गाड्या घटनास्थळी दाखल झाल्या. आगीवर नियंत्रण मिळवण्यात यश आले असून, या परिसरात असणाऱ्या काही वाहनांनाही आग लागली.
