महाराष्ट्र राज्य माध्यमिक व उच्च माध्यमिक शिक्षण मंडळाकडून दहावी परिक्षेच्या निकालाची तारीख जाहीर करण्यात आली आहे. 21 मे रोजी बारावीचा निकाल बोर्डाकडून जाहीर करण्यात आला. त्यानंतर आता आठवड्याभरात अर्थात 27 मे रोजी दुपारी एक वाजता दहावीचा निकाल जाहीर होणार आहे. दहावीची परीक्षा देणाऱ्या विद्यार्थ्यांना हा निकाल mahresult.nic या वेबसाईटवर उपलब्ध होणार आहे. महाराष्ट्र राज्य माध्यमिक शिक्षण मंडळाकडून याबाबतची अधिकृत घोषणा करण्यात आली आहे.
महाराष्ट्र राज्य माध्यमिक शिक्षण मंडळातर्फे यंदाच्या वर्षी पुणे, मुंबई, नाशिक, अमरावती, नागपूर, छत्रपती संभाजीनगर, कोकण आणि लातूर या विभागांमार्फत परिक्षा घेण्यात आली. या विभागीय मंडळांकडून उत्तर पत्रिका तपासणे आणि निकाल तयार करण्याचे काम आता पूर्ण झाले आहे. त्यामुळे आता 27 मे रोजी दहावी बोर्डाचा हा निकाल जाहीर करण्यात येणार आहे.
दरम्यान, दहावीचा निकाल जाहीर होण्यापूर्वीच अकरावी प्रवेशाची ऑनलाईन प्रक्रिया सुरु झाली आहे. राज्यातील काही भागात अकरावीचा प्रवेश ऑफलाईन पद्धतीनं करण्यात येतो. मुंबईसह काही शहरांमध्ये प्रवेश प्रक्रिया ऑनलाईन पद्धतीनं राबवली जाते.
