यंदाच्या लोकसभा निवडणुकीतील मतदान सात टप्प्यांमध्ये पार पडतंय. यावेळी तब्बल अडीच महिने लोकसभा निवडणुकीचा प्रचार सुरू होता. पहिल्या सहा टप्प्यांतील मतदान प्रक्रिया पूर्ण झाल्या नंतर आता 1 जूनला सातव्या आणि शेवटच्या टप्प्यातील मतदान प्रक्रिया पार पडणार आहे. यासाठीच्या प्रचाराची मुदतही आता संपुष्टात आलीये.
निवडणुकीच्या सातव्या टप्प्यात अर्थात 1 जून रोजी उत्तर प्रदेश, बिहार, हिमाचल प्रदेश, पंजाब, ओडिशा, पश्चिम बंगाल, झारखंड आणि चंदीगडमधील मतदारसंघात मतदान होणार आहे. सातव्या टप्प्यात एकूण 904 उमेदवार रिंगणात आहेत. एकूण उमेदवारांपैकी 328 पंजाबमधील, 144 उत्तर प्रदेश, 134 बिहार, 66 ओडिशा, 52 झारखंड, 37 हिमाचल प्रदेश आणि चार चंदीगडमधील आहेत. यापैकी विविध ठिकाणी हाय व्होल्टेज आमि प्रतिष्ठेच्या लढाया देखील रंगणार आहेत.
सातव्या टप्प्यातील हाय होल्टेज लढती
- वाराणसीमध्ये पंतप्रधान नरेंद्र मोदी (भाजप) विरुद्ध अजय राय (काँग्रेस)
निवडणुकीच्या शेवटच्या टप्प्यात पंतप्रधान नरेंद्र मोदी वाराणसीमध्ये काँग्रेस नेते अजय राय यांच्या विरोधात निवडणूक लढवणार आहेत. नरेंद्र मोदी 2014 आणि 2019 मध्ये वाराणसी मतदारसंघातून विजयी झाले आणि आता त्यांच्या तिसऱ्या कार्यकाळाकडे लक्ष लागले आहे. अजय राय पूर्वी भाजपचे नेते होते, परंतु 2012 मध्ये त्यांनी काँग्रेसमध्ये प्रवेश केला होता.
- कंगना रणौत (भाजप) विरुद्ध विक्रमादित्य सिंह (काँग्रेस) मंडीत
2024 च्या सार्वत्रिक निवडणुकांसाठी भाजपने अभिनेत्री कंगना रणौत हिमाचल प्रदेशच्या मंडी मतदारसंघातून उमेदवारी दिली आहे. माजी मुख्यमंत्री दिवंगत वीरभद्र सिंह यांचा मुलगा विक्रमादित्य सिंग यांच्याविरोधात राणौत निवडणूक लढवणार आहेत.
- गोरखपूरमध्ये रवी किशन (भाजप) विरुद्ध काजल निषाद (समाजवादी पार्टी)
अभिनेते आणि राजकारणी रवी किशन हे उत्तर प्रदेशातील गोरखपूर मतदारसंघातून भाजपचे उमेदवार आहेत आणि ते समाजवादी पक्षाच्या उमेदवार काजल निषाद यांच्या विरोधात निवडणूक लढवणार आहेत.
- अनुराग ठाकूर (भाजप) विरुद्ध सतपाल सिंग रायजादा (काँग्रेस) हमीरपूर
केंद्रीय मंत्री अनुराग ठाकूर हे हिमाचल प्रदेशातील हमीरपूर मतदारसंघातून भाजपचे उमेदवार असून, ते काँग्रेसचे उमेदवार सतपाल सिंह रायजादा यांच्याविरोधात निवडणूक लढवत आहेत.
- डायमंड हार्बरमध्ये अभिषेक बॅनर्जी (TMC) विरुद्ध अभिजित दास (भाजप)
ममता बॅनर्जी यांचे पुतणे आणि तृणमूल काँग्रेसचे उमेदवार अभिषेक बॅनर्जी हे पश्चिम बंगालच्या डायमंड हार्बर लोकसभा मतदारसंघातून निवडणूक लढवत आहेत. त्यांच्याविरोधात भारतीय जनता पार्टीकडून अभिजित दास हे निवडणुकीच्या रिंगणात आहेत.
