मुंबई | कुर्ला येथील नवीन टिळक परिसरातील एका इमारतीला शनिवारी दुपारच्या सुमारास भीषण आग लागल्याची घटना घडली आहे. इमारतीच्या १०व्या आणि ११व्या मजल्यावर ही आग लागली. हि आग इतकी भीषण होती की,या इमारतीतून अक्षरशः धुराचे लोट येत होते. आग आटोक्यात आणण्यासाठी अग्निशामक दलाच्या एकूण ८ गाड्या घटनास्थळी दाखल झाल्या आहेत. अद्याप कोणतीही जीवितहानी झाली नसल्याची माहिती मिळत आहे.
इमारतीमधील काही लोकांना बाहेर काढण्यात यश आले असून इतरांसाठी बचावकार्य सुरू आहे. स्थानिक पोलिस देखील घटनास्थळी दाखल झाले आहेत.
आग लागल्याचे नेमक कारण अद्याप अस्पष्ट आहे. मात्र शॉर्ट सर्किटमुळे ही आग लागलेली असावी, असे सांगितले जात आहे.
दरम्यान, अग्निशामक दलाच्या जवानांकडून बचावकार्य सुरू असल्याचे सांगण्यात आले आहे. पण इमारतीतील नागरिकांना बाहेर कसे काढले जाणार याकडे लक्ष लागलेले आहे. तर घरात किती लोकं अडकले आहेत यासंदर्भात अद्याप माहिती समोर आली नाही.
एका महिलेला स्थानिक गृहस्थांनी आपला जीव धोक्यात टाकून मदत केली, तर काही लोक आपला जीव वाचवण्यासाठी वाटेल त्या मार्गानी सुरक्षित ठिकाणी धाव घेत आहेत.
