मुंबई | उद्धव ठाकरे (Uddhav Thackeray) आणि नारायण राणे (Narayan Rane) या नेत्यांमधील वाद गेल्या काही वर्षांपासून चर्चेत आहे. नारायण राणे यांचे पुत्र आमदार नितेश राणे (Nitesh Rane) आणि माजी खासदार निलेश राणे (Nilesh Rane) यांच्याकडून उद्धव ठाकरे यांच्यावर सातत्याने टीका केली जात आहे. त्यानंतर आता निलेश राणे यांनी ट्विट करत पुन्हा एकदा उद्धव ठाकरेंना लक्ष्य केले आहे. यामध्ये त्यांनी ‘उद्धव तुझी उरलेली डंका जळणारच’, अशा एकेरी भाषेत उल्लेख केला आहे.
नारायण राणे यांनी शिवसेना सोडल्यापासून ठाकरे आणि राणे कुटुंबियांमध्ये मोठी कटुता निर्माण झाली आहे. या दोन्ही नेत्यांकडून एकमेकांवर अनेकवेळा आरोप-प्रत्यारोपांची फैरी झाडण्यात आल्या आहेत. तसेच शिवसेनेच्या अनेक नेतेमंडळींनीही नारायण राणे आणि त्यांच्या पुत्रावर टीका केली. त्यानंतर निलेश राणे यांनी उद्धव ठाकरेंवर निशाणा साधला. त्यामध्ये ते म्हणाले, ‘प्रभू श्रीरामाचे धनुष्यबाण उद्धव ठाकरेसारख्या लोचट माणसाकडून गेलं याचं समाधान आहे. आता मशाल, उदबत्ती, अगरबत्ती, मेणबत्ती काही घ्या. फरक पडत नाही. उद्धव तुझी उरलेली लंका जळणारच’
दरम्यान, यापूर्वीही निलेश राणे यांनी उद्धव ठाकरे यांच्यावर निशाणा साधला होता. त्यावेळी त्यांनी ‘अंधेरी पूर्वची जागा महाविकास आघाडी म्हणून पोटनिवडणूक लढणार असं काँग्रेसने जाहीर केले. उद्धवला काँग्रेसच्या कुबड्यांशिवाय चालतच नाही. मधला काळ जेव्हा उद्धव खाजवू शकत नव्हता. तेव्हा काँग्रेसच्या काही लोकांना विनंती करून ‘मला खाजवून द्या’ सांगून खाजवून देखील घेतलं असेल, अशा शब्दांत टीका केली होती.
