हैदराबाद | जैसलमेरला फिरण्यासाठी गेलेल्या तेलंगणातील गुन्हे अन्वेषण विभागाचे (सीआयडी) पोलिस महासंचालक गोविंद सिंह (Govind Singh) यांच्या कारला भीषण अपघात झाला. यामध्ये गोविंद सिंह यांची पत्नी शीला सिंह यांचा अपघातात मृत्यू झाला. तर कारचालक गंभीर जखमी झाला आहे. ही घटना रामगढ-तनोट रस्त्यावर घडली.
तनोट रस्त्यावर घाटातून गाडी जात असताना चालकाचे कारवरील नियंत्रण सुटले आणि कार पलटी झाली. या घटनेची माहिती मिळताच पोलिसांनी घटनास्थळी धाव घेतली. जखमी वाहनचालकाला रुग्णालयात दाखल करण्यात आले. पोलिसांनी दिलेल्या माहितीनुसार, तनोट मातेचे दर्शन करुन परत येत असताना गोविंद सिंह यांची कार नियंत्रणाबाहेर गेल्याने ही भीषण दुर्घटना घडली. देवीचे दर्शन घेऊन सीमा परिसरातील पोलिस चौक्यांना पाहून गोविंद सिंह हे पत्नी शीला आणि गनमॅन महेंद्र कुमार यांच्यासमवेत गाडीतून परत येत होते. त्यावेळी अपघात झाला.
दरम्यान, बीएसएफच्या रुग्णवाहिकेतून जखमींना जैसलमेर येथे नेण्यात आले. मात्र, उपचारापूर्वीच शीला सिंह यांचा मृत्यू झाला तर जवाहर रुग्णालयात चालकावर उपचार सुरु आहेत.
