मुंबई | आज (दि.२) बॉलिवूडचा किंग खान शाहरुख खानचा वाढदिवस असल्यामुळे त्याच्या चाहत्यांसाठी आनंदाचा दिवस असतो. शाहरुख खान त्याचा ५७ वा वाढदिवस साजरा करत आहे. काल मध्यरात्रीपासून देशाच्या कानाकोपऱ्यातून आणि परदेशातून कित्येक चाहत्यांनी त्याच्या बंगल्याबाहेर गर्दी केली. शाहरुखनेही नेहमीप्रमाणे बाहेर येऊन सगळ्या चाहत्यांची भेट घेतली. त्यामुळे सोशल मिडियावर ते व्हिडिओ चांगलेच व्हायरल झाले आहेत.
कालपासून शाहरुखच्या आगामी ‘पठाण’ चित्रपटाच्या टीझर प्रदर्शनाची चर्चा सुरू होती. अखेर आज शाहरुखच्या वाढदिवसानिमित्त या चित्रपटाचा टीझर प्रदर्शित करण्यात आला आहे. यश राज फिल्मच्या अधिकृत सोशल मीडिया अकाऊंटवरून हा टीझर शेअर केला आहे. शाहरुखने त्याच्या चाहत्यांना चांगलंच सरप्राइज दिलं आहे.
या टीझरमध्ये शाहरुख जबरदस्त अॅक्शन करताना दिसत आहे, त्याचा लांब केस असलेला लूक प्रेक्षकांना प्रचंड आवडला आहे. शाहरुख यात एका वेगळ्याच भूमिकेत दिसत आहे. चित्रपटाच्या टीझरवरून यात भरपूर अॅक्शन बघायला मिळणार असून यात व्हीएफएक्सचा देखील पुरेपूर वापर केला आहे. शाहरुखबरोबरच जॉन अब्राहम आणि दीपिका पदूकोण सुद्धा जोरदार अॅक्शन करताना आपल्याला पाहायला मिळणार आहे. यामध्ये दीपिकाचा हॉट आणि ग्लॅमरस लूक पाहायला मिळणार आहे.
सोशल मीडियावर या टीझरला चांगलीच पसंती मिळत आहे. शाहरुखचे चाहते कित्येक महिन्यांपासून या टीझरची आतुरतेने वाट पाहत होते. या चित्रपटाचं दिग्दर्शन सिद्धार्थ आनंद यांनी केलं आहे. शाहरुख खान, दीपिका पदूकोण आणि जॉन अब्राहम यांचा ‘पठाण’ २५ जानेवारी २०२३ रोजी चित्रपटगृहातप्रदर्शित होणार आहे.
