मुंबई | सध्या कतारमध्ये FIFA वर्ल्डकप (FIFA WORLD CUP) सुरु आहे. काही दिवसांवर याचा अंतिम सामना रंगणार आहे. हा अंतिम सामना १८ डिसेंबर रोजी होणार आहे. या अंतिम सामन्यात प्रसिद्ध अभिनेत्री दीपिका पादुकोण ट्रॉफीचं अनावरण करणार असल्याची माहिती आहे.
जगातील सर्वात मोठ्या स्पर्धेत असा मान मिळवणारी पहिली अभिनेत्री दीपिका पादुकोण असणार आहे. कतारमधील लुसेल आयकॉनिक स्टेडियममध्ये हा अंतिम सामना खेळवला जाणार आहे. दीपिकासोबत अभिनेत्री नोरा फतेही ही कतारमधील फिफा फॅन फेस्टमध्ये ‘लाइट द स्काय’ या वर्ल्ड कप गाण्यावर परफॉर्म करणार आहे.
दीपिकासाठीही फिफा वर्ल्ड कपच्या ट्रॉफीच अनावरण करणं ही सन्मानाची बाब असणार आहे. ही बातमी समोर आल्यावर दीपिकाच्या चाहत्यांनी सोशल मिडीयातून तिच्यावर शुभेच्छांचा वर्षाव केला आहे. दीपिकाच्या करिअरमधला हा क्षण नक्कीच तिच्यासाठी नेत्रदीपक असणार आहे.
दरम्यान, सध्या दीपिका अभिनेता शाहरुख खान आणि अभिनेता जॉन अब्राहमसोबत पठाणमध्ये दिसणार आहे. यासोबतच दीपिका अमिताभ बच्चन यांच्यासोबत एका रिमेकमध्येही दिसणार आहे.
