अमरावती | गेल्या काही दिवसांपासून राजकीय नेत्यांकडून एकमेकांवर टीका टिप्पणी केली जात आहे. त्यात पैशांवरून आमदार रवी राणा (Ravi Rana) आणि बच्चू कडू (Bachchu Kadu) यांच्यामध्ये वाद सुरु आहेत. त्यात आता रवी राणा यांनी बच्चू कडूंवर टीकास्त्र सोडले आहे. राणा यांनी कडूंचा फुसका फटाका असा उल्लेख केला आहे. ‘दिवा जेव्हा विझतो तेव्हा फडफड करतो, असे ते म्हणाले.
बच्चू कडू आणि रवी राणा हे दोघेही अमरावतीतील. या दोन्ही नेत्यांमध्ये गेल्या काही दिवसांपासून शाब्दिक चकमक घडत आहे. त्यात आता पैसे भेटल्यामुळे बच्चू कडू हे एकनाथ शिंदेंसोबत गुवाहाटीला गेले, असा आरोप रवी राणांनी केला. त्यानंतर या दोघांमध्ये आरोप-प्रत्यारोप सुरु आहेत. रवी राणा यांनी म्हटले की, ‘दिवा जेव्हा विझतो तेव्हा तो फडफड करतो, त्यातला ‘हा’ एक दिवा आहे, दिवाळीत खूप फटाके फुटले त्यातला ‘हा’ फुसका फटाका आहे’.
दरम्यान, आमदार बच्चू कडू व आमदार रवी राणा यांच्यातील वाद अधिक चिघळत आहे. रवी राणा यांनी केलेल्या आरोपांमुळे कडू चांगलेच संतापले असून, येत्या 1 नोव्हेंबरपर्यंत पुरावे देण्याचे आव्हान केले आहे. तसा त्यांनी अल्टिमेटमच दिला आहे.
