ट्विटरवर पुन्हा एकदा बॉयकॉटची मोहीम सुरू झाली. मात्र आता ही मोहीम एखाद्या चित्रपटाविरोधात किंवा कलाकारविरोधात नसून सध्या निशाण्यावर आहे, ई-कॉमर्स कंपनी ॲमेझॉन जन्माष्टमीच्या दिवशी राधा-कृष्णाची आक्षेपार्ह चित्रे आपल्या प्लॅटफॉर्मवर विक्रीसाठी ठेवण्यात आल्याचा आरोप ॲमेझॉनवर लावण्यात आला. या प्रकरणी हिंदू संघटनांनी ॲमेझॉन विरोधात पोलिसात तक्रार दाखल केली आहे. हिंदू जनजागृती समितीने दिलेल्या माहितीनुसार, ॲमेझॉन तसचे एक्झॉटिक इंडिया या आणखी एका कंपनीच्या वेबसाईवर राधा-कृष्णाच्या त्या चित्राची विक्री होत आहे. त्यामुळे ॲमेझॉन सह त्या कंपनीविरोधातही तक्रार दाखल करण्यात आली आहे. समितीच्या सांगण्यानुसार, वाढता विरोध पाहून ॲमेझॉनने त्यांच्या प्लॅटफॉर्मवरून विक्रीसाठी उपलब्ध असलेले ते चित्र हटवले आहे.
राधा-कृष्णाच्या चित्राबाबत ही बातमी समोर आल्यानंतर आता सोशल मीडियावर ॲमेझॉन या ई-कॉमर्स कंपनीला जोरदार विरोध होत असून बॉयकॉट ॲमेझॉन हा हॅशटॅग ट्रेंडमध्ये आहे. हिंदू जागृती संघटनेने सोशल मीडियावर माहिती दिली आहे की, ॲमेझॉन आणि एक्झॉटिक इंडिया या दोन्हींच्या प्लॅटफॉर्मवरून सध्या हे चित्र हटवण्यात आले आहे. हे चित्र जन्माष्टमी सेल या नावाने वेबसाइटवर विक्रीसाठी उपलब्ध होते. या प्रकरणाचा वाद वाढल्यानंतर आता सोशल मीडियावर लोक ॲमेझॉनच्या पूर्वीच्या वादांबद्दलही बोलताना दिसत आहेत. आपल्या प्लॅटफॉर्मवर विक्रीसाठी ठेवण्यात आलेल्या उत्पादनांवरून ॲमेझॉन कंपनी यापूर्वीही अनेक वेळा वादात सापडली होती. मात्र हिंदू संघटनांच्या म्हणण्यानुसार, हे विवादीत चित्र फक्त प्लॅटफॉर्मवरून काढून टाकणेच पुरेसे नाही. तर दोन्ही कंपन्यांनी त्याबद्दल समोर यऊन माफीही मागितली पाहिजे, अशी मागणीही करण्यात येत आहे.
ॲमेझॉन वर यापूर्वीही अनेक वेळा धार्मिक भावना दुखावल्याचा आरोप लावण्यात आला होता. 2019 सालीही कंपनीविरोधात गुन्हा दाखल करण्यात आला होता. ॲमेझॉनच्या अमेरिकेतील वेबसाईटवर रग आणि टॉयलेट कव्हर्सवर देवी-देवतांचे फोटो छापून, ते विक्रीसाठी ठेवण्यात आल्याचे प्रकरण तेव्हा घडले होते. सध्य ज्या राधाा-कृष्णाच्या पेंटिंगवरून वाद सुरू आहे, आणि दुसऱ्या कंपनीविरोधात लोकांच्या मनात राग आहे, ती कंपनी बंगळुरू येथील आहे. ही कंपनी ॲमेझॉनवर विक्रीसाठी पेंटिग्ज सादर करते. ट्विटरवर या कंपनीविरोधातही अनेक ट्विट्स केली जात आहेत.