पुणे | मागील महिन्यात शिवसंग्राम संघटनेचे अध्यक्ष आणि माजी आमदार विनायक मेटे यांचा मुंबई-पुणे द्रुतगती महामार्गावर झालेल्या अपघातात दुर्देवी मृत्यू झाला. या अपघाताबाबत अनेक तर्क वितर्क लावले जात आहेत. पावसाळी अधिवेशनात देखील विनायक मेटेंच्या अपघातावर चर्चा झाली.
माजी आमदार विनायक मेटे यांनी मराठा समाजाच्या आरक्षणासाठी यांनी अनेक वर्ष संघर्ष केला. मेटे यांच्यानंतर संघटनेची धुरा आता त्यांच्या पत्नी ज्योती मेटे यांनी स्वीकारण्याची शक्यता अनेकजण व्यक्त करताना दिसत आहेत.आता ज्योती मेटे पुण्यात राज्यस्तरीय बैठक घेणार असून याबाबतची स्पष्टता येण्याची शक्यता आहे.
राज्यभरातील शिवसंग्राम संघटनेच्या कार्यकर्त्यांना ज्योती मेटे संबोधित करणार असल्याचं सांगण्यात आलं आहे. येत्या ६ सप्टेंबर रोजी ही राज्यस्तरीय बैठक होणार आहे. या बैठकीला शिवसंग्रामचे कार्यकर्ते आणि पदाधिकारी उपस्थित राहणार आहे.
विनायक मेटे यांच्या जाण्याने मराठा समाजाची मोठी हानी झाली आहे. त्यामुळे मेटे यांच्या पत्नी ज्योती मेटे यांना राज्यापाल कोट्यातून विधानपरिषदेवर घ्यावं आणि आमदार करावं, अशी मागणी देखील राष्ट्रवादी काँग्रेसचे प्रवक्ते अंकुश काकडे यांनी यापुर्वी केली होती.
