पुणे | पुण्यात सद्या रोड रोमियोंच्या प्रकरणांमध्ये वाढ होताना पाहायला मिळत आहे. एखाद्या तरुणीला प्रेमाच्या जाळ्यात ओढण्यासाठी तिचा विनयभंग करण्याचा प्रयत्न केल्याप्रकरणी पोलीस ठाण्यांमध्ये विनयभंगाचे गुन्हे दाखल होण्याच्या घटना शहरात सातत्याने घडत असतात. यातच आत पुण्यात एका ६० वर्षीय जेष्ठ व्यक्तीने शेजारी राहणाऱ्या ५१ वर्षीय महिलेला प्रपोज केल्याचा प्रकार घडला आहे. अश्लील गाणी गात आपल्याला त्रास दिल्याचा महिलेचा आरोप आहे. या प्रकरणी या ज्येष्ठ नागरिकावर येरवडा पोलीस ठाण्यात विनयभंगाचा गुन्हा दाखल करण्यात आला आहे. या प्रकरणी संबंधीत ६० वर्षीय ज्येष्ठ नागरिकावर गुन्हा दाखल करण्यात आला आहे. याबाबत पीडित महिलेने फिर्याद दिली आहे.
या प्रकरणाबाबत पोलिसांनी दिलेल्या माहितीनुसार, गुन्हा दाखल झालेला संशयीत आरोपी हा ६० वर्षे वयाचा असून त्यास दारूचे व्यसन आहे. दोघांमध्ये पूर्वीपासूनचे वादही आहे. दिनांक २२ ऑगस्ट रोजी संशयित आरोपी फिर्यादीच्या घरासमोर आला. त्याने फिल्मी अंदाजात ५१ वर्षीय महिलेला, ‘तू खूप सुंदर दिसते, मला खूप आवडतेस, आपण दोघे फिरायला जावू’, असे म्हणत तिला प्रपोज केले. तसेच त्याने अश्लील हावभाव करून आपण मज्जा करून म्हणत महिलेच्या मनास लज्जा उत्पन्न होईल असे वर्तन केले. तसेच तिला अश्लील भाषेत शिवीगाळही केली.
त्यानंतर पीडित महिलेने त्याला तुम्ही तुमच्या घरात जाऊन झोपा, मला त्रास देवू नका, असे म्हटले. महिलेने असे म्हटल्यानंतर चिडलेल्या ज्येष्ठ नागरिकाने तिला अश्लील भाषेत शिव्या दिल्या. तसेच महिलेला ऐकू जाईल अशा जोरदार आवाजात अश्लील गाणी म्हणून तिला त्रास दिला. पिकल्या पानाचा देठ की हो हिरवा, हे गाणे गात या जेष्ठ नागरिकाने महिलेचा विनयभंग केला असे महिलेचे म्हणणे आहे. या प्रकरणी गुन्हा दाखल करण्यात आला आहे. या प्रकरणात दोघांमध्ये जागेवरून वाद असून याप्रकरणात न्यायालयात आरोपपत्र दाखल करण्यात आला आहे.
