मेरीलँड | अमेरिकेत पुन्हा एकदा गोळीबाराची धक्कादायक घटना समोर आली आहे. शुक्रवारी मेरीलँडमधील एका घरात तीन लहान मुलांसह ५ जणांची गोळ्या झाडून हत्या करण्यात आली आहे. एवढेच नाही तर ९११ वर कॉल करून त्याच घरातून एका व्यक्तीने पोलिसांना या गोळीबाराची माहितीही दिली, अशी माहिती अधिकाऱ्यांनी दिली आहे.
सेसिल काउंटी शेरीफ स्कॉट अॅडम्स यांनी सांगितले की, इल्क मिल्समधील दुमजली घरात शुक्रवारी सकाळी एक पुरुष, एक महिला आणि तीन मुले मृतावस्थेत आढळून आली. ही तिन्ही मुले अनुक्रमे पाचवी, सातवी आणि आठवी इयत्तेत शिकतात. अधिकार्यांनी तत्काळ पीडितांची ओळख जाहीर केली नसली, तरी त्यांनी आश्वासन दिले की आहे सर्वसामान्यांना कोणताही धोका नाही.
बाल्टिमोरच्या सुमारे ९७ किलोमीटर ईशान्येस आणि डेलावेअर राज्य मार्गाच्या पश्चिमेस काही मैल अंतरावर जंगली भागांनी वेढलेल्या निवासी रस्त्यांचा एका भागातील कुल-डी-सॅक येथे ही गोळीबाराची घटना घडली. अॅडम्स म्हणाले की, तो एक भयानक दिवस होता. या घटनेने चिंतेत असलेले आणि घाबरलेले लोक मला सतत फोन करत आहेत. हे दुःखदायक आहे आणि सेसिल काउंटीमध्ये हा प्रकार काही सामान्य गोष्ट नाही. हे दुःखद आणि भयानक आहे.
दुसर्या अधिकाऱ्याने सांगितले की, सकाळी ९ च्या सुमारास एका व्यक्तीने घरातून कॉल केला, ज्याने सांगितले की तीन मुले आणि एका महिलेला गोळ्या घालून ठार केले आहे. पोलिसांचे पथक तेथे पोहोचले तेव्हा एक व्यक्ती मृतावस्थेत आढळून आली. मृत व्यक्तीजवळ एक सेमी ऑटोमॅटिक हँडगन पडलेली होती. शेरीफने हल्लेखोराचा हेतू काय असावा यावर भाष्य करण्यास नकार दिला.
घरात वेगवेगळ्या ठिकाणी मृतदेह पडून असल्याचे अधिकाऱ्यांनी सांगितले. त्याचवेळी टॉम ड्रिस्कॉल नावाच्या शेजाऱ्याने सांगितले की तीन मुलांसह हे जोडपे किमान पाच वर्षांपासून येथे राहत होते. हे जोडपं येथे राहायचे आणि मुले वसतिगृहात राहायची आणि ते नाताळ आणि इतर सुट्टीच्या दिवशी यायचे. या तीन मुलांमध्ये दोन मुली आणि एका मुलाचा समावेश असल्याचे अधिकाऱ्यांनी सांगितले.
