मॉस्को | रशिया आणि युक्रेन (Russia Ukraine War) या दोन्ही देशांत गेल्या काही महिन्यांपासून युद्ध सुरु आहे. या दोन्ही देशातील सैन्य एकमेकांसमोर उभं ठाकले आहे. रशियन आणि युक्रेन सैन्य एकमेकांवर हल्ले-प्रतिहल्ले करत असताना पिता-पुत्रामध्येही ही लढाई सुरु झाली आहे. कारण वडील रशियन सैन्यात कर्नल तर मुलगा युक्रेन सैन्यात जवान आहे. त्यामुळे हे दोघे एकमेकांविरोधात शस्त्रे घेण्यासाठी पुढे आले आहेत.
रशियाचे राष्ट्राध्यक्ष व्लादिमीर पुतीन यांनी युद्धाची घोषणा केल्यानंतर रशियाचे सैन्य आणि युक्रेन सैन्य एकमेकांसमोर आले आहे. दोन्ही देशांकडून मोठ्या शस्त्रास्त्रांचा वापर केला जात आहे. पण या युद्धात पिता-पुत्रही समोर आले आहेत. पण हे एकमेकांचे विरोधक म्हणून आले आहेत. आर्तुर असे 27 वर्षीय युक्रेनच्या जवानाचे नाव आहे. त्याने रशियन कर्नल असलेल्या आपल्या वडिलांविरोधात शस्त्र हातात घेतले आहे. आर्तुर याचे वडील ओलेग हे रशियन सैन्यात कर्नल या पदावर आहेत.
युद्ध सुरु झाल्यानंतर ओलेग याने मुलगा आर्तुर याला युद्धात सहभागी होऊ नये, असे सांगितले होते. कारण रशियाविरोधात युक्रेनचे सैन्य जास्त दिवस टिकणार नाही. मात्र, आर्तुरने वडील ओलेग यांच्या सूचनेकडे दुर्लक्ष केले असून, युक्रेनच्या सैन्यात भरती झाला आणि पूर्व युक्रेनमध्ये रशियाविरोधात मोर्चा सुरु केला आहे.