कोलकाता | कोलकाता आंतरराष्ट्रीय चित्रपट महोत्सव नुकताच पार पडला. त्यामध्ये बॉलिवूडचे महानायक अमिताभ बच्चन देखील उपस्थित होते. महोत्सवादरम्यान त्यांनी सेन्सॉरशिप आणि अभिव्यक्ती स्वातंत्र्यावर भाष्य केलं आहे. यावर बोलताना, आजही सिनेमाचा विचार करताना सर्वात आधी अभिव्यक्ती स्वातंत्र्यावर प्रश्न उपस्थित होत आहेत. तसेच मला खात्री आहे उपस्थित असलेला प्रत्येक व्यक्ती हे मान्य करेल.
पुढे बोलताना, सिनेमाची निवड करण्याबद्दल खूप विचार केला जातो. चांगल्या दर्जाच्या सिनेमांची निर्मिती होत आहे. पौराणिक, ऐतिहासिक, कौटुंबिक, सामाजिक अशा वेगवेगळ्या विषयांवर भाष्य करणाऱ्या सिनेमांची निर्मिती करण्यात येत आहे. सिनेमा प्रेक्षकांना सिनेमागृह ते ओटीटी कोणत्याही प्लॅटफॉर्मवर पाहता येत आहेत. आपण प्रेक्षकांना गृहित धरू शकत नाही. त्यामुळे त्यांना काय पाहायचं हा त्यांचा वैयक्तिक निर्णय आहे. असेदेखील ते म्हणाले आहेत.
तसेच शाहरुख खानने त्याच्या आगामी ‘पठाण’ सिनेमाच्या वादावर प्रतिक्रिया देत काही लोक सोशल मीडियाच्या माध्यमातून नकारात्मकता पसरवण्याचा प्रयत्न करत आहे. खरंतर सिनेमा हे समाज बदलण्याचं माध्यम आहे. असेदेखील शाहरुख म्हणाला.
दरम्यान, कोलकाता आंतरराष्ट्रीय चित्रपट महोत्सावत शाहरुख खान, जया बच्चन, राणी मुखर्जीसह अनेक कलाकार मंडळी तसेच देशभरातील अनेक दिग्गजांनी हजेरी लावली होती.