मुंबई | हृतिक रोशन आणि सैफ अली खानच्या ‘विक्रम वेधा’ची प्रतीक्षा लवकरच संपणार आहे. दरम्यान सिनेमा रिलीज होण्यासाठी या ॲक्शन ड्रामासाठी चाहते उत्सुक असल्याचं दिसत आहे. याचं कारण म्हणजे विक्रम वेधासाठी होत असलेलं प्री-बुकिंग! निर्मात्यांनी ‘विक्रम वेधा’चे आगाऊ बुकिंग सुरू केले आहे. आता तिकीट बुक करून प्रेक्षक लवकरच हा ॲक्शन मुव्ही पाहू शकतील.
‘विक्रम वेधा’च्या ट्रेलरला प्रेक्षकांचा उदंड प्रतिसाद मिळाला. हृतिक-सैफचा लूक, त्यांच्यातील फाइट सीक्वेन्स, राधिका आपटेचा अभिनय या सर्वाचेच कौतुक होत आहे. त्यानंतर या सिनेमातील ‘अल्कोहोलिया’ हे गाणं देखील प्रदर्शित झालं. आता सगळ्यांच्या नजरा सिनेमाच्या कमाईकडे लागल्या आहेत की हृतिक आणि सैफची जोडी बॉक्स ऑफिसवर काय कमाल करू शकते.
प्रेक्षकांची प्रतीक्षा संपवत निर्मात्यांनी शनिवारपासून चित्रपटाचे आगाऊ बुकिंग सुरू केले आहे. सध्या, प्रेक्षक १२५० मल्टिप्लेक्समध्ये सिनेमाचं तिकीट खरेदी करू शकतात. तुम्ही आता या सिनेमाचं तिकीट बुक करून ३० सप्टेंबरला याचा आनंद घेऊ शकता. या महिनाअखेर ‘विक्रम वेधा’ जगभरातील विविध स्क्रिन्सवर प्रदर्शित केला जाणार आहे. सध्या या सिनेमाची स्टारकास्ट प्रमोशनमध्ये व्यग्र आहे. या आठवड्यात हृतिक आणि सैफ द कपिल शर्मा शोमध्येही येणार आहेत.
मिळालेल्या माहितीनुसार, काही प्राथमिक आकडेवारी समोर आली आहे. आगाऊ बुकिंगच्या पहिल्या दिवशी विक्रम वेधाची १००८ तिकीट विकली गेली आहेत. यातून सुरुवातीच्या काही तासातच सिनेमाने ८.७८ लाखांची लाखांची कमाई केली. आगाऊ बुकिंगच्या पाच दिवसातच विक्रम वेधा चांगली कमाई करेल असा अंदाज व्यक्त केला जातो आहे.
विक्रम वेधा हा सिनेमा तामिळ सिनेमाचा रिमेक आहे. २०१७ साली आलेल्या या सिनेमात आर माधवन आणि विजय सेतूपती यांनी मुख्य भूमिका साकारली होती. विक्रम वेधा हा सिनेमा गुलशन कुमार, टी-सीरिज आणि रिलायन्स एंटरटेनमेंटने फ्रायडे फिल्मवर्क्स अँड जियो स्टुडिओज आणि YNOT स्टुडिओज प्रोडक्शनच्या बॅनरखाली बनवण्यात आले आहे.
