लोकसेवा कॉलेज ऑफ फार्मसीतर्फे ‘सकस आहार जनजागृती अभियाना’मध्ये विद्यार्थ्यांना मार्गदर्शन
पुणे | हिरव्या भाज्या, फळे, ताजे अन्न, दूध, उसळ अशा पदार्थांचे शाळेतील मुलांनी सेवन करणे आवश्यक असून योग्य आहार हे एक प्रकारचे औषध आहे. त्यांचा समावेश दररोजच्या आहारात करावा, असे आवाहन लोकसेवा कॉलेज ऑफ फार्मसी फुलगाव अंतर्गत विस्तार विभाग यांच्या वतीने आयोजित केलेल्या ‘सकस आहार जनजागृती अभियान’ दरम्यान करण्यात आला. या अभियाना अंतर्गत तुळापूर येथील छत्रपती श्री संभाजी विद्यालयातील विद्यार्थ्यांशी संवाद साधण्यात आला.
शाळकरी मुलांचे वय वाढीचे असते. या वयात मुलांची वाढ झपाटय़ाने होत असल्यामुळे त्यांना अन्नाची जास्त गरज असते. या कारणामुळे या वयात सर्व अन्नघटकांना फार महत्त्व असते. संतुलित आहार अशा वयात फार गरजेचा असतो. जीवनसत्वे, प्रथिने, स्निग्ध, पिष्टमय पदार्थांचे आहारातील महत्त्व आणि त्यांची वाढत्या वयातील मुलांना असणारी गरज यावर विद्यार्थ्यांना चित्र फलक, भिंत्तीपत्रकाद्वारे माहिती दिली.
यावेळी छत्रपती श्री संभाजी विद्यालयाचे मुख्याध्यापक जाधव हे उपस्थित होते. सामाजिक औषधशास्त्र संकल्पनेतील आरोग्य शिक्षण प्रसारासाठी या कार्यक्रमाचे आयोजन लोकसेवा फार्मसी कॉलेजचे प्राचार्य नरहरी पाटील यांच्या मार्गदर्शनाखाली विस्तार विभाग प्रमुख दिपाली भंडारी, प्रियांका व्यवहारे यांनी केले. या वेळी अफ्रोज मुलानी, ऋतुजा कुलकर्णी, सागर सोनार उपस्थित होते. या कार्यक्रमात दिप्ती काटकर, विश्वास गायकवाड, सृष्टी वाघोले, प्रताप सावंत, प्रीती भंडारे, सत्यम लाटकर या विद्यार्थ्यांनी सहभाग घेतला होता.