मुंबई | माजी मंत्री आणि राष्ट्रवादी काँग्रेसचे नेते नवाब मलिक (Nawab Malik) हे आर्थिक गैरव्यवहारप्रकरणी गेल्या काही दिवसांपासून न्यायालयीन कोठडीत आहेत. त्यांनी जामिनासाठी न्यायालयात अर्ज केला होता. मात्र, त्यांना जामीन मंजूर झाला नाही. त्यामुळे आणखी 14 दिवस मल्लिक यांचा कोठडीतील मुक्काम वाढणार आहे.
नवाब मलिक हे सध्या कुर्ला येथील रुग्णालयात उपचार घेत आहेत. आर्थिक गैरव्यवहार प्रकरणी नवाब मलिक यांना सक्तवसुली संचालयाने फेब्रुवारीमध्ये अटक केली होती. अंडरवर्ल्ड डॉन दाऊद इब्राहिमशी संबंधित मालमत्ता खरेदी करताना आर्थिक गैरव्यवहार केल्याप्रकरणी मलिक यांच्याविरोधात गुन्हा दाखल करण्यात आला आहे. त्यावरून मलिक गेल्या फेब्रुवारीपासून कोठडीत आहेत.
दरम्यान, जामीन अर्जावरील सुनावणीदरम्यान न्यायालयाने त्यांची विनंती मान्य केली नाही. त्यामुळे आता त्यांना आणखी 14 दिवस कोठडीत राहावे लागणार आहे. नवाब मलिक यांना 2 नोव्हेंबरपर्यत न्यायालयीन कोठडी सुनावली आहे.