पुणे | ॐ नमस्ते गणपतये.. त्वमेव प्रत्यक्षं तत्त्वमसि.. त्वमेव केवलं कर्तासि.. अशा स्वरांनी पुणे शहर दुमदुमलं.
तब्बल ३१ हजार महिलांच्या मुखातून अथर्वशीर्ष पठणाचे सामूहिक स्वर उमटले गेले. ऋषिपंचमीच्या निमित्ताने पहाटे श्रीमंत दगडूशेठ हलवाई गणपतीसमोर अथर्वशीर्षच्या मंत्रोच्चाराने वातावरण मंगलमय आले होते. कोराना संकटामुळे गेले दोन वर्ष अश्याप्रकारचे सामुदायिक पठण झाले नव्हते. प्रदीर्घ प्रतीक्षेनंतर यंदाच्या गणेशोत्सवात हा सोहळा गणेशभक्तांनी अनुभविला.
श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळातर्फे ऋषिपंचमीच्या निमित्ताने आयोजन करण्यात आले होते. या अथर्वशीर्ष पठण उपक्रमाचे यंदा ३५ वे वर्ष होते.
पहाटे ३१ हजार महिलांनी मंडपासमोर अथर्वशीर्ष पठण केले.उत्सव मंडपापासून ते हुतात्मा चौकापर्यंतच्या परिसर महिलांच्या शिस्तबद्ध रांगेत अथर्वशीर्ष पठण करीत गणरायाला नमन केले.
महिलांनी शंखनाद केल्यानंतर ॐकार जप करत हात उंचावून टाळ्यांचा गजर करण्यात आला.
ट्रस्टच्या जय गणेश पालकत्व योजनेतील विद्यार्थ्यानी स्वातंत्र्य सेनानींच्या माहितीचे फलक हातात घेऊन त्यांना अभिवादन केले. तसेच सुवर्णयुग तरुण मंडळाची दहीहंडी फोडताना शौर्याने व एकटयाने दहीहंडी फोडणा- या प्रथमेश कारळे या गोविंदास ट्रस्टतर्फे सन्मानचिन्ह, महावस्त्र व २५ हजार रुपये देऊन सन्मानित करण्यात आले.
यावेळी प्रख्यात गायिका अनुराधा पौडवाल, परिमंडळ १ च्या पोलीस उपायुक्त डॉ. प्रियांका नारनवरे, ट्रस्टचे महेश सूर्यवंशी, सुवर्णयुग मंडळाचे अध्यक्ष प्रकाश चव्हाण, यतिश रासने, मंगेश सूर्यवंशी, बाळासाहेब सातपुते, माऊली रासने, उपक्रम प्रमुख शुभांगी भालेराव, अर्चना भालेराव उपस्थित होते. आरतीने कार्यक्रमाची सांगता झाली.
