मुंबई | राजकारण म्हणजे मिमिक्री नव्हे, आवाज काढणं खूप झालं आता आपण मॅच्युअर झाला आहात असा खोचक टोला खासदार संजय राऊतांनी राज ठाकरेंना लगावला आहे. मनसे अध्यक्ष राज ठाकरे यांनी पक्षाच्या गट अध्यक्षांच्या मेळाव्यात उद्धव ठाकरे यांच्यावर केलेल्या टीकेला राऊतांनी प्रत्युत्तर दिलं आहे.
राज ठाकरे यांनी या सभेत राहुल गांधी आणि उद्धव ठाकरे यांची मिमिक्री केली होती. याच मुद्द्यावर राऊत यांनी ठाकरे यांना टोला लगावला. “राजकारण म्हणजे मिमिक्री नव्हे, आम्हाला मिमिक्री पाहायची असेल तर जॉनी लिव्हर यांची ओरिजनल मिमिक्री पाहू. राजकारणात आता अजून किती दिवस आवाज काढत बसणार? आता तरी मॅच्युअर व्हा आणि प्रगल्भ राजकारण करा. आवाज काढणं आता खूप झालं. याच्या पलिकडे पाहायला हवं, संपूर्ण महाराष्ट्र पाहा. उद्धव ठाकरेंवर टिका करुन तुमचं राजकारण किती दिवस चालणार? जरा विधायक आणि संघटनात्मक काम करा. आता आमच्यावर इतकी संकटं आलेली आहेत तरी आम्ही लढतो आहोत. काम करतो आहेत. जे टिका करताहेत त्यांनी बुलढाण्याची सभा पाहायला हवी, असं देखील संजय राऊत म्हटले आहे.
दरम्यान, भाजपाचे टगे आता महापुरूषांचा अपमान करुन महाराष्ट्राला शहाणपणा शिकवत आहेत. पण त्यांनी लक्षात ठेवावं की महाराष्ट्र बघतो आहे. त्यांना जनता कधीच माफ करणार नाही. महापुरूषांचा अपमान होत असताना भाजपा आणि शिंदे गट हात चोळत बसला आहे. देशातील कोणत्याही महान नेत्याचा अपमान होऊ नये अशी आमची नेहमीच भूमिका राहिलेली आहे. त्यांच्यावर चिखलफेक करुन राजकारण कसलं करताय? सावरकरांबाबत इतकंच प्रेम उफाळून येत असेल तर भारतरत्न द्या की आम्हीही साथ देऊ, असं संजय राऊत म्हणाले.
