एकीकडे लोकसभा निवडणुकीची रणधुमाळी सुरू असतानाच दुसरीकडे महाराष्ट्र विधानपरिषदेच्या शिक्षक आणि पदवीधर मतदारसंघाची निवडणूक जाहीर झाली आहे..शिर्डीतील गणेश कारखाना निवडणुकीत विखे पाटलांना आव्हान देणारा युवानेता अशी राज्यात ओळख निर्माण करणारे अर्थात कोपरगावच्या माजी आमदार आणि भाजप नेत्या स्नेहलता कोल्हे यांचे पुत्र विवेक कोल्हे विधानपरिषद निवडणुकीच्या रिंगणात उतरले आहेत.ते भाजपात जरी असले तरी त्यांनी नाशिक विभाग शिक्षक मतदारसंघातून अपक्ष उमेदवारी अर्ज दाखल केला आहे..त्यामुळे नाशिक विभाग शिक्षक मतदारसंघाची निवडणूक कशी रंगतदार ठरणार आहे ? हे आपण या व्हिडिओतून पाहू.
लोकसभा निवडणूक संपताच नाशिक शिक्षक मतदार संघाच्या निवडणुकीची रणधुमाळी सुरु झाली आहे..यात भाजपच्या माजी आमदार स्नेहलता कोल्हे यांचे चिरंजीव विवेक कोल्हे काय करतात याकडे सर्वांचं लक्ष लागलं होतं. ते भाजपकडून उभे राहतील की आणखी काही प्लॅनिंग करतील याकडे सगळ्यांच्याच नजरा लागलेल्या होत्या कारण महसूल मंत्री राधाकृष्ण विखे पाटील यांचे बंधू डॉ. राजेंद्र विखे पाटील यांनी देखील आमदारकीसाठी इच्छा व्यक्त केली होती. भाजपातून डॉ. राजेंद्र विखे पाटील आणि विवेक कोल्हे दोघांचीही नावं चर्चेत होती..पण विवेक कोल्हे यांनी पक्षाकडून उमेदवारी मिळेल याची वाट न बघता अपक्ष उमेदवारी अर्ज भरला आहे.त्यामुळे विवेक कोल्हे भाजपात असताना देखील अपक्ष फॉर्म भरून भाजपशी बंडखोरी केली अशी चर्चा रंगू लागली आहे..कोल्हे सत्यजित तांबे यांनी वापरलेला पॅटर्न वापरणार असंही बोललं जात आहे.फेब्रुवारी २०२३ मध्ये नाशिक पदवीधर मतदारसंघामध्ये अनेक नाट्यमय घडामोडी घडल्या होत्या…तांबे यांनी काँग्रेसमध्ये असताना ऐनवेळी अपक्ष उमेदवारी अर्ज भरला होता.उमेदवारी अर्ज दाखल केल्यानंतर त्यांनी अनेक पक्षांकडे जाऊन पाठिंबा मागणार असल्याचं सांगितलं होतं. दुसरीकडे काँग्रेस पक्षाशी बंडखोरी केल्याने त्यांचं निलंबन करण्यात आलं. त्यामुळे सत्यजित तांबे अपक्ष उमेदवार म्हणून रिंगणात उतरले आणि त्यांच्याविरोधात उभा राहिलेल्या शुभांगी पाटील यांचा त्यांनी पराभव केला होता. त्यावेळी त्यांना भाजपचा छुपा पाठिंबा मिळाल्याची चर्चा झाली होती.आता सत्यजित तांबे यांनी वापरलेल्या पॅटर्न प्रमाणे कोल्हे अपक्ष उभे राहत असून सर्वच पक्षांचा पाठिंबा घेतली अशी चर्चा सुरू झाली आहे.
या सर्व घडामोडींवर विवेक कोल्हे यांनी म्हटलं आहे की, मी काही बंडखोरी केलेली नाही. जिथं मला निवडणूक लढायची आहे तो मतदारसंघ शिक्षकांशी निगडित आहे. त्यामुळे इथं राजकीय दृष्टिकोनातून पाहताच येणार नाही. शिक्षकांचे प्रश्न सुटणे महत्वाचं असून सर्वच पक्षांनी एकत्रितपणे प्रयत्न करायला हवेत. पक्ष विरहित उमेदवारी करावी असा शिक्षकांचा आग्रह असल्याने मी अपक्ष लढण्याच ठरवलं आहे. तसेच अपक्ष उमेदवारी करतो त्यावेळी कुठल्याही पक्षाकडे पाठिंबा मागण्याचा प्रश्न येत नाही. असं स्पष्टीकरण कोल्हेंनी दिलंय.विवेक कोल्हे आणि त्यांचे समर्थक गेले महिनाभर नाशिक विभागातील सर्व जिल्ह्यांमध्ये जाऊन उमेदवारीची तयारी करत होते. कोल्हे या मतदारसंघातून एक प्रभावी उमेदवार ठरू शकतात…महाराष्ट्र राज्य साखर संघ, नगर जिल्हा बँक, कोपरगाव औद्योगिक संस्था अशा विविध संस्थांवर ते कार्यरत आहेत.तसेच कोल्हे यांच्याकडे शैक्षणिक संस्था असून नाशिक जिल्ह्यातील शैक्षणिक संस्थांमध्ये त्यांचा चांगला संपर्क आहे..बाळासाहेब थोरात यांच्या संगमनेर तालुक्यात तसेच रयत शिक्षण संस्थेतही कोल्हे यांचा चांगला संपर्क आहे..कोल्हे यांना कोपरगावचे आमदार आशुतोष काळे यांचा पाठिंबा मिळण्याची शक्यता आहे.. त्यांनी आपली मोठी यंत्रणा या निवडणुकीत उतरवली आहे. सहकारमहर्षी शंकरराव कोल्हे सहकारी साखर कारखान्याचे अध्यक्ष या नात्याने त्यांनी आपलं कर्तृत्व सिध्द केलंय. अडचणीतला गणेश कारखाना यशस्वीपणे चालवून दाखवला.कोल्हे हे अपक्ष मैदानात असले तरी इथं बहुरंगी लढत होण्याची चिन्ह आहे.कारण इच्छुकांची भली मोठी रांग लागली आहे.या शिक्षक मतदारसंघामध्ये नाशिक विभागातील ग्रामीण व शहरी मिळून ५५ आमदार व ५ खासदारांचं कार्यक्षेत्र आहे तसेच ५२ तालुक्यांनी हा मतदारसंघ व्यापलेला आहे. गेल्या निवडणूकीत किशोर दराडे यांनी शिवसेना पुरस्कृत उमेदवार म्हणून निवडणूक लढवली होती. त्यावेळी त्यांनी काँग्रेस-राष्ट्रवादी आघाडीचे संदीप बेडसे यांचा २४ हजार ३६९ मतांनी पराभव केला होता. भाजपचे अनिकेत पाटील हे तिसऱ्या क्रमांकावर राहिले होते. सुमारे ५३ हजार मतदारांनी नोंदणी केली होती. त्यावेळी ९२.३० टक्के मतदान झालं होतं.यावेळी अनेक जण इच्छुक असल्याने मतांचं विभाजन होईल.या मतदारसंघात २६ जून रोजी मतदान होणार आहे.विवेक कोल्हे यांच्या पदरात किती मतं पडतील.हे १ जुलै ला स्पष्ट होईल.आता विवेक कोल्हे आपल्या यंत्रणेच्या जोरावर या निवडणुकीत किती यशस्वी होतात हे लकवरच स्पष्ट होईल.