मुंबई क्रिकेट असोसिएशनचे अध्यक्ष अमोल काळे यांचे हृदयविकाराच्या झटक्याने निधन झाल्याने मुंबई क्रिकेट असोसिएशनच्या अध्यक्षपदाची जागा रिक्त आहे. मुंबई क्रिकेट असोसिएशनच्या अध्यक्षपदाची निवडणूक येत्या २३ जुलै रोजी पार पडणार आहे. नाना पटोले आता क्रिकेटच्या राजकारणात उतरणार असल्याची चर्चा सुरु असतानाच नाना पटोले यांनी मुंबई क्रिकेट असोसिएशनच्या अध्यक्षपदासाठी अर्ज दाखल केला असून त्यांनी आता क्रिकेटच्या राजकारणात प्रवेश केलाय.
मुंबई क्रिकेट असोसिएशनचे अध्यक्ष अमोल काळे यांच्या निधनामुळे क्रिकेट असोसिएशनच्या अध्यक्षपदाची जागा रिक्त झाली असून यासाठी येत्या २३ जुलैला निवडणूक होणार आहे देशाच्या क्रिकेटमध्ये मुंबई क्रिकेट असोसिएशन ही एक महत्त्वाची क्रिकेट संघटना असून त्याचं कार्यक्षेत्र हे मुंबई आणि त्याच्या आसपासच्या असलेल्या ठाणे, नवी मुंबई, डहाणू, बदलापूरपर्यंत आहे. बराच काळ शरद पवार मुंबई क्रिकेट असोसिएशनच्या अध्यक्षपदाची भूमिका बजावत होते. शरद पवारांप्रमाणेच अनेक राजकीय नेत्यांनी अध्यक्षपदाची धुरा सांभाळली आहे त्यामध्ये मनोहर जोशी यांचा देखील समावेश आहे. तर गेल्या काही दिवसांपासून नाना पटोले हे मुंबई क्रिकेट असोसिएशनच्या अध्यक्षपदासाठी इच्छुक असल्याच बोललं जात होतं त्यामुळे ते अध्यक्षपदाच्या निवडणुकीत उतरणार असल्याची चर्चा होती. अखेर सर्व चर्चांना पूर्णविराम देत नाना पटोले यांनी मंगळवारी २ जुलैला निवडणुकीसाठी अर्ज दाखल केल्याची माहिती समोर आली आहे.
काँग्रेस प्रदेशाध्यक्ष नाना पटोले हे माझगाव क्रिकेट क्लबचे प्रतिनिधी होते त्यामुळे त्यांना मुंबई क्रिकेट असोसिएशनच्या निवडणुकीत मतदानाचा हक्क बजावता येणार आहे. नाना पाटोलेंच्या आधी अनेक नेत्यांनी माझगाव क्रिकेट क्लबचं प्रतिनिधीत्व केलं असून यामध्ये माजी मुख्यमंत्री विलासराव देशमुख माजी केंद्रीय मंत्री गोपीनाथ मुंडे तसेच माजी मुख्यमंत्री पृथ्वीराज चव्हाण या नेत्यांचा समावेश आहे. आता माझगाव क्रिकेट क्लबची धुरा नाना पटोलेंच्या हाती सोपवण्यात आली आहे मुंबई क्रिकेट असोसिएशनच्या अध्यक्ष पदी बराच काळ शरद पवार असल्याने त्याठिकाणी त्यांचे वर्चस्व होते त्यानंतर अमोल काळे यांची अध्यक्षपदी निवड झाली. अमोल काळे हे देवेंद्र फडणवीस यांचे निकटवर्तीय असल्याने त्याठिकाणी देवेंद्र फडणवीस यांचे वर्चस्व होते पण आता काँग्रेस नेते नाना पटोले अध्यक्षपदाच्या निवडणुकीत उतरलेत यामुळे यंदाची मुंबई क्रिकेट असोशिएशनची निवडणूक रंगतदार होणार असल्याची शक्यता वर्तवली जात आहे.