पुणे | माँ आशापुरा माता मंदिर चॅरिटेबल ट्रस्टच्या वतीने गंगाधाम चौकाजवळील माँ आशापुरा माता मंदिरात नवरात्रोत्सवाच्या निम्मिताने आज विशेष ‘श्री सूक्त पठणाचे’ आयोजन करण्यात आले. श्री सूक्त पठणाच्या या धार्मिक कार्यक्रमाचे उद्दिष्ट प्राचीन वेदपीठाची ओळख करून देणे आणि त्यामधील अध्यात्मिक संदेश मनात रुजविणे हा होता. यासाठी पुण्यातील महावीर स्कूल, रसिकलाल माणिकचंद धारिवाल स्कुल, कोठारी इंटरनॅशनल स्कुल या शाळांनी सहभाग नोंदविला. नवरात्र उत्सवाच्या निम्मित आयोजित केलेल्या या ‘श्री सूक्त पठणाला माँ आशापुरा माता मंदिर ट्रस्टचे प्रमुख व जीतो अॅपेक्स चे राष्ट्रीय अध्यक्ष विजय भंडारी व ट्रस्टचे चेतन भंडारी, अशोक मेहता, भारती भंडारी, मंजू मेहता, आदेश खिंवसारा, श्याम खंडेलवाल तसेच शाळांमधील जवळपास १००० विद्यार्थी व भक्तगण मोठ्या संख्येने उपस्थित होते. ज्यामुळे मंदिराचा संपूर्ण परिसर भक्तिमय वातावरणाने भारावून गेला.
श्री सूक्त पठण करून कार्यक्रमाची सुरुवात झाली. सुमधुर आवाजात एकत्र पठण करणाऱ्या विद्यार्थ्यांच्या आवाजाने मंदिराचा संपूर्ण परिसर हा भक्तिमय झाला व विद्यार्थ्यांच्या सुरांनी मंदिराच्या आवारात नवीन ऊर्जा व सकारात्मकता निर्माण झाली. तसेच हे दृश्य उपस्थित भक्तांसाठी अतिशय मनमोहक व प्रेरणादायी होते. शाळांच्या शिक्षकांनी व मंदिराच्या ट्रस्टच्या सदस्यांनी या कार्यक्रमाच्या आयोजनासाठी महत्त्वाची भूमिका बजावली. तसेच विद्यार्थ्यांच्या मार्गदर्शनासाठी ट्रस्टने विशेष व्यवस्था केली होती यामुळे विद्यार्थ्यांना पठणाचे योग्य शिक्षण मिळाले. या कार्यक्रमामुळे नव्या पिढीला वेद आणि संस्कृती ची ओळख होईल तसेच मुलांमध्ये अध्यात्मिकता आणि शिस्तीचा विकास होईल हा उद्देश समोर ठेवून ‘श्री सूक्त पठणाचे’ आयोजन करण्यात आले होते. श्री सुक्त पठणाच्या या उपक्रमामुळे विद्यार्थ्यांच्या मनात भारतीय संस्कृतीबद्दल आस्था निर्माण झाली असून अशा प्रकारच्या धार्मिक व शैक्षणिक कार्यक्रमांद्वारे मुलांना अध्यात्मिकतेची ओळख मिळण्याचा संदेश देण्यात आला. त्यानंतर माँ आशापुरा माता मंदिर चॅरिटेबल ट्रस्टच्या सदस्यांकडून शाळेच्या सर्व शिक्षकांचे सत्कार करण्यात आले व देवीची आरती करण्यात आली.
