मुंबई | महाराष्ट्रात सुरु असलेल्या सत्तासंघर्षावर सर्वोच्च न्यायालयात सुनावणी झाली. यावेळी शिवसेना पक्षप्रमुख उद्धव ठाकरे आणि मुख्यमंत्री एकनाथ शिंदे या दोन्ही गटांच्या बाजूने दिग्गज वकिलांकडून जोरदार युक्तिवाद करण्यात आला. मात्र विजय आपलाच होणार, आई भवानीवर विश्वास आहे, अशा शब्दात उद्धव ठाकरेंनी विजयाची खात्री व्यक्त केली. नवरात्रौत्सवाच्या कालावधीत न्यायालयाचा कोणाला कौल मिळणार, याची उत्सुकता आहे.
उध्दव ठाकरे म्हणाले,
विजय आपलाच होणार, आई भवानीवर विश्वास आहे. कितीही अफजल खान आले तरी घाबरणार नाही, अशी गर्जना उद्धव ठाकरेंनी केली. उस्मानाबादहून आलेल्या शिवसेना कार्यकर्त्यांसमोर ठाकरे बोलत होते. यावेळी शिवसेना आमदार कैलास पाटील यांनी काही कार्यकर्त्यांना मातोश्रीवर नेऊन शिवबंधन बांधलं. दसरा मेळावा शिवाजी पार्कच्या मैदानावर घेण्याचा निर्णय मुंबई उच्च न्यायालयाने ठाकरेंच्या बाजूने दिल्यामुळे शिवसैनिकांमध्ये उत्साह संचारला आहे. मात्र सुप्रीम कोर्टात सध्या सुरु असलेल्या सुनावणीच्या पार्श्वभूमीवर दोन्ही गटात चिंता आणि धाकधूक आहे.
आताचं जे वातावरण आहे ते भारावून टाकणारे आहे. आई भवानीचा आशीर्वाद असल्यावर कोणी किती अफजल खान आले तरी मला त्याची पर्वा नाही. दसऱ्याला आपण भेटणारच आहोत एक चांगली सुरुवात झाली आहे. दुसरी केस न्यायालयात सुरू आहे, माझा आई भवानीवर आणि सर्वोच्च न्यायालयावर विश्वास आहे. न्याय आपल्याला मिळणार आणि मिळालाच पाहिजे, तुळजाभवानीच्या दर्शनाला मी येणारच आहे. मला धाराशिव जिल्ह्याचे कौतुक करायचं आहे कारण कैलासने काय केलं हे सर्वांना माहिती आहे. कैलासने काय पराक्रम केले ते तुम्हा सर्वांना माहिती आहे, ओमराजे देखील कसा रक्त पाळतोय हे तुम्ही देखील बघितलंय, तुमच्या आधी जालनाचे लोक आले होते जालनाची परिस्थिती काय आहे सर्वांना माहिती आहे, परिस्थिती काय आहे हे तुम्हाला माहिती आहे अशीच परिस्थिती संपूर्ण महाराष्ट्रात आहे, असं ठाकरेंनी सांगितलं.
ज्यांना तुम्ही मोठे केले ते खोक्यात गेले, मी तर अजून घराच्या बाहेर पडलो नाहीये, ज्या क्षणी मी वर्षा सोडून मातोश्रीत आलो तेव्हापासून असे शिवसैनिक मातोश्रीवर येत आहेत. जर शिवसैनिक बोलले असते तर एक मेळावा इथेच झाला असता, दसरा मेळाव्याच्या कितीतरी पटीने एक मिळावा इथेच झाला असता, मला फोन येत आहेत कुठेही काही आपलं वाकडं झालेलं नाही, भवानी मातेची कृपा आहे, ती कृपा नाही तर खरे कोण आणि चुकीचे कोण हे दाखवून दिलंय. शिवाजी महाराजांना भवानी मातेने तशी तलवार दिली अशी श्रद्धा आहे तसंच तसंच तुमच्याकडे बघून मला असं वाटतंय की भवानी मातेने मला ही तलवार दिली आहे, अशा भावना उद्धव ठाकरेंनी व्यक्त केल्या.
