शिमला | पंतप्रधान नरेंद्र मोदी उत्तराखंडच्या दौऱ्यावर आहेत. केदारनाथचे दर्शन घेत रुद्राभिषेक करून त्यांनी केदारनाथमध्ये सुरू असलेल्या विकास कामांचा आढावा घेतला. त्यानंतर ते बद्रीनाथकडे रवाना झाले.
त्यांचा उत्तराखंड दौरा असला तरी याचा संबंध हिमाचल प्रदेशच्या निवडणुकीशी जोडण्यात येत आहे. त्याचबरोबर शुक्रवारी सकाळी पंतप्रधान मोदी यांच्या परिधान केलेल्या पेहरावाने सगळ्यांचे लक्ष वेधून घेतले आहे. चंबामधील वेशभूषा आणि हिमाचली टोपीच्या माध्यमातून पंतप्रधान मोदी यांनी केदारनाथचा दौरा हा हिमाचल प्रदेशला केंद्रीत ठेवून केला असल्याची चर्चा सुरू झाली आहे.
पंतप्रधान मोदी यांनी परिधान केलेल्या पेहरावाला ‘चोल डोरा’ असं म्हणतात. हा पोषाख नुकत्याच हिमाचल प्रदेशच्या दौऱ्यादरम्यान महिलांनी पंतप्रधानांना भेट म्हणून दिला होता. त्यांनी बाबा केदारनाथची विधीवत पूजा करत रुद्राभिषेकदेखील केला.
पंतप्रधान नरेंद्र मोदी यांनी यावेळी केदारनाथमध्ये भाविकांच्या सोयीसाठी सुरू असलेल्या विकासकामांचा आढावा घेतला. मंदाकिनी आस्था पथ आणि सरस्वती आस्था पथासह इतर विकासकामांची पाहणी केली. पंतप्रधान मोदी यांनी केदारनाथ रोप-वे योजनेचे भूमीपूजन केले. हा रोप-वे 9.7 किलोमीटर लांबीचा आहे. गौरीकुंड आणि केदारनाथला हा रोप-वे जोडला जाणार आहे. त्यामुळे हे अंतर गाठण्यासाठी सहा तासांऐवजी अवघे 30 मिनिटे लागणार आहे. त्याशिवाय, हेमकुंड रोप-वे गोविंदघाट आणि हेमकुंड साहिब या दोन ठिकाणांना जोडणार आहे. हा रोप-वे 12.4 किमी लांबीचा असणार आहे. सध्या या दोन ठिकाणादरम्यानच्या प्रवासाला एक दिवसाचा कालावधी लागतो. रोप-वे नंतर हा कालावधी 45 मिनिटांवर येणार आहे. यामुळे भाविकांना मोठा फायदा होणार आहे.
पंतप्रधान झाल्यानंतर नरेंद्र मोदी यांनी वर्ष 2017 मध्ये पहिल्यांदा केदारनाथचा दौरा केला. त्यानंतर या वर्षी ते दोनदा केदारनाथमध्ये होते. त्यानंतर जवळपास दरवर्षी ते केदारनाथ येथे दर्शनासाठी जातात. वर्ष 2020 मध्ये लॉकडाउनमुळे त्यांचा दौरा स्थगित करण्यात आला होता. त्यानंतर ते सलग दुसऱ्या वर्षी केदारनाथमध्ये दाखल झाले.
