भारतीय क्रिकेट संघाच्या नव्या मुख्य प्रशिक्षकाची सध्या जोरदार चर्चा आहे. वास्तविक, टी20 विश्वचषकानंतर राहुल द्रविड टीम इंडियाचा मुख्य प्रशिक्षक असणार नाही. त्यामुळे बीसीसीआय नवीन मुख्य प्रशिक्षकाचा शोध घेत आहे. यासाठी बीसीसीआयने यापूर्वीच जाहिरात प्रसिद्ध केली आहे. गौतम गंभीरचेही नाव मुख्य प्रशिक्षकपदाच्या शर्यतीत आहे. पण बीसीसीआयला परदेशी प्रशिक्षकांमध्येही काही प्रमाणात रस आहे. परदेशी प्रशिक्षक म्हणून स्टीफन फ्लेमिंगचे नावही घेतले जात आहे. जो सध्या चेन्नई सुपर किंग्जचा मुख्य प्रशिक्षक आहे.
चेन्नईचे सीईओ कासी विश्वनाथन यांनी चेन्नई सुपर किंग्जच्या यूट्यूब चॅनलला दिलेल्या मुलाखतीत एक मनोरंजक खुलासा केला आहे. त्या मुलाखतीत ते म्हणाले की, “मला खरंतर भारतीय पत्रकारांचे बरेच फोन आले ज्यांनी स्टीफनला भारतीय संघाचा प्रशिक्षक बनण्यास स्वारस्य आहे का असे विचारले. म्हणून मी गमतीने स्टीफनला विचारले, तुम्ही भारतीय कोचिंग असाइनमेंटसाठी अर्ज केला आहे का? आणि स्टीफन फक्त हसला आणि म्हणाला, ‘मी भारताचा हेड कोच व्हावे अशी तुमची इच्छा आहे का?’ वास्तविक फ्लेमिंगला वर्षातील 10 महिने कोणत्याही संघासाठी पूर्णवेळ प्रशिक्षक म्हणून काम करण्याची इच्छा नाही. त्यामुळे माझी त्याच्यासोबत या विषयाशी निगडित कोणतीही चर्चा झालेली नाही”
स्टीफन फ्लेमिंग न्यूझीलंडचे माजी कर्णधार आणि चेन्नई सुपर किंग्जचा प्रशिक्षक आहे. आयपीएलमध्ये चेन्नई सुपर किंग्जचे मुख्य प्रशिक्षक असण्याव्यतिरिक्त, फ्लेमिंग मेजर लीग क्रिकेट (यूएसए) मध्ये टेक्सास सुपर किंग्ज, एसए 20 (दक्षिण आफ्रिका) मधील जोबर्ग सुपर किंग्ज आणि द हंड्रेडमध्ये सदर्न ब्रेव्ह या संघांचा प्रशिक्षक आहे.
