पुणे | कुख्यात गुंड गजानन उर्फ गज्या मारणे याच्यासह त्याच्या टोळीतील 14 जणांविरोधात महाराष्ट्र संघटित गुन्हेगारी नियंत्रण कायद्यान्वये (मोक्का) कारवाई करण्यात आली. पोलिस आयुक्त अमिताभ गुप्ता यांनी कारवाईचे आदेश दिले आहेत.
शेअर दलालाचे २० कोटींच्या खंडणीसाठी अपहरण करुन मारहाण केल्याच्या प्रकरणात गज्या मारणे याच्यासह १४ जणांच्या विरोधात ‘मोक्का’अंतर्गत गुन्हा दाखल करण्यात आला आहे. यामध्ये गजानन उर्फ गज्या पंढरीनाथ मारणे (रा. शास्त्रीनगर, कोथरुड), सचिन उर्फ पप्पू घोलप (रा. धनकवडी) प्रसाद खंडागळे (रा. तळजाई पठार, पद्मावती), हेमंत उर्फ अण्णा बालाजी पाटील (वय ३९, रा. बुरली, ता. पलूस, जि. सांगली), अमर शिवाजी किर्दत (वय ४६), फिरोज महमंद शेख (वय ५०, दोघे रा. कोडोवली, जि. सातारा), रुपेश कृष्णराव मारणे (रा. शास्त्रीनगर, कोथरुड), संतोष शेलार (रा. कोथरुड), मोनिका अशोक पवार (रा. दापोडी), अजय गोळे (रा. नऱ्हे), नितीन पगारे (रा. सातारा) यांच्यासह इतर साथीदारांवर मोक्का कारवाई करण्यात आली.
याप्रकरणी हेमंत पाटील यांनी तक्रार दिली. पाटील यांची शेअर मार्केट व्यवहाराची कंपनी आहे. या कंपनीत हेमंत पाटील यांनी चार कोटी रुपयांची गुंतवणूक केली होती. तक्रारदार यांची कंपनी डबघाईला आल्याने परतावा देता आला नाही. पाटील याने वारंवार चार कोटींच्या बदल्यात २० कोटींची मागणी केली होती. याला कंटाळून पाटील यांनी अखेर पोलिसांत धाव घेतली.