पुणे | धनुर्मास हा भगवान विष्णूचा आशीर्वाद मिळविण्यासाठी अतिशय शुभ महिना म्हणून ओळखला जातो. या काळात माता गोदादेवी भगवान विष्णूंना तिचा वर म्हणून प्राप्त करण्यासाठी उपवास करते आणि तिची उपासना बघून भगवान विष्णू धनुर्मासाच्या २७व्या दिवशी तिच्याशी विवाह संपन्न करतात. ही भावना ठेवत माँ आशापुरा माता मंदिरात माता गोदादेवी आणि भगवान विष्णू यांचा विवाह सोहळा पार पडला. हा विवाह सोहळा बुधवारी दि.११ जानेवारी रोजी पारंपरिक पद्धतीने उत्साहात साजरा करण्यात आला.
भारतातील विविध राज्यांमध्ये श्री गोदम्बाजी विवाह सोहळा उत्साहात साजरा केला जातो. ही एक महत्त्वपूर्ण संधी मानली जाते. भाविक सकाळी लवकर उठून मनोभावे प्रार्थना करत असतात. यादरम्यान विष्णू सहस्त्र नाम आणि इतर धार्मिक मंत्रांचं पठनही केले जाते. भगवान विष्णूसह गोदादेवीचीही पूजा केली जाते. गोदादेवीने भगवान विष्णूला प्रसन्न करण्यासाठी दररोज भजन-कीर्तन करून जवळपास 30 दिवसांपर्यंत खऱ्या श्रद्धेने त्यांची पूजा केली आणि धनुर्मासच्या प्रसंगी विवाह केला, अशी पौराणिक कथा आहे. या धनुर्मासात गोदा रंगनाथ कल्याण उत्सव यांचे सर्वाधिक महत्त्व असते.
माँ आशापुरा माता मंदिरात झालेल्या या विवाह सोहळ्यात वर पक्षाकडून नरेंद्र गोयल परिवार तर वधू पक्षाकडून राजेश सोनी परिवार हे सहभागी झाले होते. हा विवाह सोहळा १० आणि ११ जानेवारी या दोन दिवसात पार पडला.या सोहळ्यात पारंपरिक पद्धतीने मेहंदी,हल्दी कार्यक्रमाचे आयोजन करण्यात आले होते, विवाहानिमित्त सनई चौघडे, रांगोळीच्या पायघड्या, ढोल ताशांसह शोभा यात्रा काढण्यात आली. यावेळी अनेक धार्मिक कार्यक्रम घेण्यात आले. गेल्या 30 दिवसांपासून रोज सकाळी भजन-कीर्तनही झाले.
या कार्यक्रमासाठी श्याम खंडेलवाल, दिलीप मुनोत, राजेंद्र गोयल, मंगेश कटारिया यांच्यासह इतर सहकाऱ्यांनी अथक परिश्रम घेत हा संपूर्ण कार्यक्रम उत्साहात पार पडला.