मुंबई | शिवसेनेतून बंडखोरी करत बाहेर पडलेल्या एकनाथ शिंदे (Eknath Shinde) यांनी शिवसेना (Shivsena) हे नाव आणि धनुष्यबाण निवडणूक चिन्ह (Election Symbol) मिळावे यासाठी अनेक प्रयत्न केले आहेत. शनिवारी निवडणूक आयोगाने शिवसेनेचे निवडणूक चिन्ह असलेले धनुष्यबाण गोठवण्याचा निर्णय दिला. त्यानंतर नव्या चिन्हासाठी काही पर्याय देऊ केले आहेत. उद्धव ठाकरे यांनी दिलेल्या पर्यायावरच आता शिंदे गट नवी रणनीति आखत ठाकरे गटाची कोंडी करण्याचा प्रयत्न करत आहे.
उद्धव ठाकरे गटाकडून निवडणूक आयोगाकडे पर्यायी पक्षचिन्हांची यादी सादर करण्यात आली होती. यामध्ये धगधगती मशाल, त्रिशूल आणि उगवता सूर्य या तीन चिन्हांचा समावेश होता. त्यानंतर शिवसेनेकडून पर्यायी चिन्हांची यादी केंद्रीय निवडणूक आयोगापुढे सादर करण्यात आली होती. मात्र, आता दुसऱ्याच दिवशी शिंदे गटानेही धगधगती मशाल आणि त्रिशूळ या दोन चिन्हांवर दावा सांगितला आहे. त्यामुळे नवा पेच निर्माण झाला आहे.
दरम्यान, निवडणूक आयोगाच्या कार्यपद्धतीनुसार एकाच बाबीवर दोन पक्षांचा दावा असल्यास संबंधित बाब कोणालाच न देता बाद ठरवली जाते. त्यामुळे धगधगती मशाल आणि त्रिशूळ ही दोन्ही चिन्ह बाद होण्याची दाट शक्यता आहे.