मुंबई | काँग्रेस नेते राहुल गांधी यांनी सुरू केलेली ‘भारत जोडो’ यात्रा सध्या जोरदार सुरु आहे. यामुळे काँग्रेसचे शक्तीप्रदर्शन व राहुल गांधींची छबी तयार होत आहे. या यात्रेचा महाराष्ट्रातील प्रवास नोव्हेंबरच्या पहिल्या आठवड्यात होणार असून, मराठवाड्यातील नांदेड जिल्ह्यातून ‘भारत जोडो’ यात्रा राज्यात प्रवेश करणार आहे. महाविकास आघाडी राज्यात एकत्र असल्यामुळे आपणही या यात्रेत सहभागी व्हावे, असे निमंत्रण काँग्रेसच्या शिष्टमंडळाकडून काल (ता.१८ ऑक्टोबर) राष्ट्रवादी काँग्रेसचे प्रमुख शरद पवार आणि शिवसेना पक्षप्रमुख उद्धव ठाकरे यांना देण्यात आले आहे.
दरम्यान, या दोन्ही नेत्यांकडून हे निमंत्रण स्वीकारण्यात आल्याचे समजते आहे. पवार आणि उद्धव ठाकरे किंवा आदित्य ठाकरे या यात्रेत सहभागी होणार असल्याचे शिष्टमंडळाला सांगण्यात आल्याची माहिती मिळत आहे. ठाकरेंच्या या यात्रेतील सहभागावरून भाजपने व्यंगचित्राच्या माध्यमातून ठाकरे पिता- पुत्राची खिल्ली उडवली आहे.
काँग्रेसचे महाराष्ट्र प्रभारी एच.के. पाटील, माजी मुख्यमंत्री अशोक चव्हाण, काँग्रेस विधीमंडळ पक्षाचे नेते बाळासाहेब थोरात आणि मुंबई विभागीय काँग्रेस कमिटीचे अध्यक्ष आमदार भाई जगताप, काँग्रेसचे विधान परिषदेचे गटनेते अमरनाथ राजूरकर यांच्या शिष्टमंडळाने ‘मातोश्री’वर उद्धव ठाकरे तर सिल्व्हर ओक येथे यासंदर्भात शरद पवारांनाची भेट घेतली आणि या भारत जोडो यात्रेत सहभागी होण्याचे आमंत्रण दिले. यावरून ठाकरे आणि पवार या यात्रेत सहभागा होणार का, याकडे सर्वांचे लक्ष लागले आहे.
यावरून भाजपकडून उद्धव ठाकरेंवर टीका करण्यास सुरूवात करण्यात आली असून भाजपने आपल्या अधिकृत ट्वीटर हॅंडलवरून एक व्यंगचित्र ट्वीट करत ठाकरे आणि पवारांची खिल्ली उडवली आहे. या चित्राला “काँग्रेसकडून उद्धव ठाकरेंना ‘भारत जोडो’ यात्रेत सहभागी होण्याचे आदेश!”, असे कॅप्शन दिले आहे.
दरम्यान, भारत जोडो यात्रेनिमित्ताने राहूल गांधी यांची कित्येक किलोमीटरची पायपीट आणि त्यात सर्वसामान्यांना सोबत घेत ढवळून काढलेले वातावरण यामुळे त्यांच्या या यात्रेची जगभरात चर्चेत होत आहे. ७ सप्टेंबर पासून १० जानेवारी पर्यंत, देशातील १२ राज्यातून ही भारत जोडो पदयात्रा जाणार आहे. तामिळनाडूतील कन्याकुमारी पासून सुरू झालेल्या या भारत जोडो यात्रेचा प्रवास केरळ, कर्नाटक, आंध्र प्रदेश, तेलंगाणा, महाराष्ट्र, मध्यप्रदेश, राजस्थान, हरयाणा, उत्तर प्रदेश, दिल्ली आणि पंजाब असा असेल.
ही यात्रा महाराष्ट्रात नोव्हेंबर महिन्याचा पहिल्या आठवड्यात साधरणतः ५ तारखेला दाखल होण्याची शक्यता आहे. लहान मुलांपासून ते वयोवृद्धांपर्यंत समाजातील प्रत्येक घटक या यात्रेत सहभागी होतांना दिसतआहे. राहूल गांधी यांचा या यात्रेतील साधेपणा सगळ्यांनाच भावत असल्याने महाराष्ट्रात देखील भारत जोडो यात्रेचे असेच जल्लोषात आगमन झाले पाहिजे, यासाठी कॅाग्रेस नेते आणि माजी मुख्यमंत्री अशोक चव्हाण तयारीला लागले आहेत. आता ठाकरे आणि पवार या यात्रेत सहभागी होणार का याची उत्सुकता सर्वांना लागली आहे.