मुंबई | महाराष्ट्रातील राजकारणात दिवसेंदिवस अनेक घडामोडी घडत आहेत. शिवसेनेतील बहुतांश नेतेमंडळी शिंदे गटात सहभागी होत आहेत. त्यानंतर आता माजी पोलिस अधिकारी आणि शिवसेना नेते भाऊसाहेब आंधळकर (Bhausaheb Andhalkar) यांनी शिवसेनेला रामराम केला आहे. मुख्यमंत्री एकनाथ शिंदे यांच्या उपस्थितीत त्यांनी शिंदे गटात प्रवेश केला आहे. ‘आताच्या घडीला शिवसेनेत फक्त करा कष्ट अन् खावा उष्ट अशी परिस्थिती झाली आहे’, असा आरोप त्यांनी केला आहे.
आंधळकर यांनी पोलिस सेवेतून निवृत्त झाल्यानंतर शिवसेनेत प्रवेश केला. पण आता ठाकरे गट आणि शिंदे गट वेगळे झाल्यानंतर दोन्ही नेत्यांमध्ये उभी फूट पडली आहे. त्यात आंधळकर यांनी शिंदे गटात प्रवेश केला आहे. मुख्यमंत्री शिंदे यांना भेटून हा पक्षप्रवेश झाला आहे. त्यावेळी त्यांनी शिवसेनेवर टीकास्त्र सोडले. ‘सर्वसामान्य शिवसैनिकांना किंवा कार्यकर्त्यांना आता मान-सन्मान राहिला नाही. बार्शी तालुक्यात शिवसैनिकांना साधी एन्ट्री देखील नव्हती. त्यावेळी शिवसेना वाढविण्यात मोठा प्रयत्न केला. तरीही पक्षातील पक्षश्रेष्ठी हे पक्षप्रमुखांशी भेटूही देत नाहीत. आताच्या घडीला शिवसेनेत फक्त करा कष्ट अन् खावा उष्ट अशी परिस्थिती झाली आहे’, अशा शब्दांत त्यांनी निशाणा साधला.
दरम्यान, आंधळकर यांच्या शिंदे गटातील प्रवेशाने शिवसेना उद्धव बाळासाहेब ठाकरे गटासाठी हा मोठा धक्का मानला जात आहे. कारण आतापर्यंत अनेक मंत्री, खासदार, आमदार आणि पदाधिकारी शिंदे गटात गेले आहेत. त्यानंतर आता आंधळकर यांनी प्रवेश केला आहे.