मुंबई | आज महाराष्ट्रात चौथ्या टप्प्याचं मतदान पार पडत आहे तर दुसरीकडे शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी थेट पंतप्रधान मोदी यांच्यावर शाब्दिक हल्लाबोल केला आहे.
‘सामना’साठी खासदार संजय राऊत यांनी ठाकरेंची दोन भागांमध्ये घेतलेली मुलाखत सध्या राजकीय वर्तुळात चर्चेचा विषय ठरत आहे. या मुलाखतीच्या दुसऱ्या भागात ठाकरेंनी शिवसेनेतील फूट, एकनाथ शिंदेंची भूमिका व भाजपाचा या सगळ्यामधील सहभाग यावर भाष्य केलं. यावेळी बोलताना, त्यांनी भाजपवर शाब्दिक हल्लाबोल करत मुख्यमंत्री एकनाथ शिंदे यांचा ‘लबाड’ असा उल्लेखही केला .
याशिवाय २०१४ साली भाजपाने शिवसेनेशी युती तोडल्याचा मुद्दा मांडताना त्यांनी पंतप्रधान नरेंद्र मोदींचा उल्लेख केला. २०१४ साली मोदींच्या पंतप्रधानपदाला पाठिंबा देण्याचं पहिलं पाप शिवसेनेनं केलं. मी ते पापच मानतो कारण आता ते आम्हाला संपवायला निघाले आहेत. ते सगळं स्वप्नवत होतं पण त्याच वर्षी ऑक्टोबरच्या विधानसभा निवडणुकीत आम्ही असं कोणतं पाप केलं होतं की भाजपानं शिवसेनेशी युती तोडली. तेव्हा तर आम्ही काँग्रेसबरोबर गेलो नव्हतो. तेव्हा यांच्या मानेवर बसलेल्या औरंगजेबाच्या फॅनक्लबमध्ये नव्हतो. मग तुम्ही माझ्याशी युती का तोडली होती? एकनाथ खडसेंनीही सांगितलंय की त्यांना वरून आदेश आले होते की युती तोडल्याचं जाहीर करा असं उद्धव ठाकरे म्हणाले.
उद्धव ठाकरेंनी दिलं आव्हान!
दरम्यान, उद्धव ठाकरेंनी निवडणूक आयुक्त आणि मुख्यमंत्री एकनाथ शिंदे यांना जाहीर आव्हान दिलं आहे. माझा पक्ष काढून घेण्याचा अधिकार निवडणूक आयोगाला आणि विधानसभा अध्यक्षांनाही नाही. त्यांनी आव्हान देताना महाराष्ट्राच्या जनतेला आपण बोलवू, एकही पोलीस सोबत घ्यायचा नाही. मी जनतेमध्ये येऊन उभा राहतो. निवडणूक आयुक्तांमध्ये तेवढं धाडस असेल तर त्यांनी तिथे यावं, या लबाडानं यावं आणि तिथे सगळ्यांच्या समोर मध्ये उभं राहून सांगावं पक्ष कुणाचा आहे ते. जो निर्णय जनता देईल तो मी मान्य करायला तयार आहे, अशा शब्दांत उद्धव ठाकरेंनी मुख्यमंत्री एकनाथ शिंदेंवरही टीकास्र सोडलं.