मुंबई | ‘एकवेळ आई-वडिलांना शिव्या द्या. कोल्हापूरमध्ये तर आईवरून शिव्या द्यायची पद्धतच आहे. मात्र, पंतप्रधान मोदीजी आणि गृहमंत्री अमित शाह यांना शिव्या दिलेल्या सहन करणार नाही’, असे वक्तव्य राज्याचे उच्च व तंत्र शिक्षणमंत्री चंद्रकांत पाटील यांनी गुरुवारी (दि.६) केले.
पुणे जिल्ह्याच्या पालकमंत्रिपदी निवड झाल्याबद्दल चंद्रकांत पाटील यांचा भाजपच्या वतीने सत्कार करण्यात आला. यावेळी त्यांनी केलेले विधान चांगलेच चर्चेत आले आहे. ते म्हणाले, कोथरूड या मतदारसंघातून मला जेव्हा पक्षाने उमेदवारी दिली. त्यावर बराच वाद झाला होता. मात्र, पक्षाने काहीतरी विचार करूनच मला उमेदवारी दिली होती.
दरम्यान, पाटील यांनी मुख्यमंत्री एकनाथ शिंदे यांचे कौतुक केले. एकनाथ शिंदे यांनी जो निर्णय घेतला त्या निर्णयासाठी धाडस लागतं. त्यामुळे आम्ही त्यांना अंतर जाणवू देणार नाही. २१ जूनला महाराष्ट्रात बंड झालं. शिवसेनेचे नेते एकनाथ शिंदे यांच्यासह ४० आमदारांनी बंड पुकारला. त्यानंतर शिवसेना दुभागली आहे. शिवसेनेत ठाकरे गट आणि दुसरा शिंदे गट असे दोन गट पडले आहेत, असेही ते म्हणाले.
…हे सांगायला काही वेडा नव्हतो
कोल्हापूर, सातारा आणि सोलापूरमध्ये कामे केली आहेत. हातकणंगले मतदारसंघातील निवडणूक आणि त्यावेळी झालेल्या आरोप-प्रत्यारोपांचाही उल्लेख चंद्रकांत पाटील यांनी भाषणात केला.
मी दोन-अडीच वर्षांपासून सांगत होतो की, आपले सरकार येईल, मी हे सांगायला काही वेडा नव्हतो. काही ना काही संदर्भ माझ्या मनात होते. त्याची योजना माझ्या मनात होती.
४० जणांना फोडणं सोपं नव्हतं
सर्वात महत्त्वाचे म्हणजे मला कार्यकर्त्यांना विश्वास द्यायचा होता. ४० जणांना फोडणं सोपं नव्हते. त्यासाठी वेळ लागणार होता. त्यासोबत तशी संधी येणं महत्त्वाचं असतं. योग्य वेळ आल्यानंतर आम्ही ती वेळ साधली. त्यानंतर आपले सरकार आले, असे चंद्रकांत पाटील यांनी सांगितले.