महाराष्ट्र काँग्रेसचे नेते आणि राज्याचे माजी मंत्री नितीन राऊत हे ‘भारत जोडो’ यात्रेत जखमी झाले आहेत. हैदराबाद येथील रुग्णालयात उपचार सुरू असून प्रकृती स्थिर असल्याची माहिती देण्यात आली आहे. नितीन राऊत हे हैदराबाद येथे ‘भारत जोडो’ यात्रेत सहभागी झाले होते. त्यावेळी गर्दीत त्यांना धक्का लागला आणि तोल गेल्याने ते पडले. त्यांच्या डाव्या डोळ्याजवळ इजा झाली आहे.
काँग्रेस नेते राहुल गांधी यांच्या नेतृत्वात भारत जोडो यात्रा सुरू आहे. ही यात्रा तेलंगणात दाखल झाली आहे. नितीन राऊत हे राहुल गांधी यांच्यासोबत यात्रेत चालत असताना कार्यकर्ते व नागरिकांची मोठी गर्दी होती. सामान्य जनता, कार्यकर्त्यांकडून राहुल गांधी यांच्या भेटीसाठी धडपड करीत होते. या गर्दीतून मार्ग काढत राहुल यांच्या जवळ जाण्यासाठी प्रयत्न करीत होते. अशाच प्रयत्नात कुणाचा तरी राऊत यांना धक्का लागला असल्याचे सांगण्यात येत आहे. मंगळवारी रात्री सिटीस्कॅन करण्यात आले. त्यांची जखम फारशी गंभीर नसल्याची माहिती देण्यात आली. डाव्या डोळ्याजवळ जखम झाली असून डोक्याला मार लागला आहे.