मुंबई | गेल्या काही दिवसांपासून शिवसेना (Shivsena) पक्ष आणि धनुष्यबाण या निवडणूक चिन्हावर ठाकरे गट आणि शिंदे गट यांच्याकडून दावा केला जात होता. त्यानंतर आता निवडणूक आयोगाने यावर निर्णय दिला आहे. निवडणूक आयोगाने ठाकरे यांच्या गटाला ‘शिवसेना (उद्धव बाळासाहेब ठाकरे)’ हे नाव दिले तर ‘मशाल’ हे निवडणूक चिन्ह दिले आहे. याशिवाय शिंदे गटाला ‘बाळासाहेबांची शिवसेना’ हे नाव देण्यात आले आहे. मात्र, त्यांच्या चिन्हावर अद्याप निर्णय दिला नाही.
शिवसेनेतून बंडखोरी करत बाहेर पडलेल्या एकनाथ शिंदे (Eknath Shinde) यांनी शिवसेना (Shivsena) हे नाव आणि धनुष्यबाण निवडणूक चिन्ह (Election Symbol) मिळावे यासाठी अनेक प्रयत्न केले होते. मात्र, शनिवारी निवडणूक आयोगाने शिवसेनेचे निवडणूक चिन्ह असलेले धनुष्यबाण गोठवण्याचा निर्णय दिला. त्यानंतर नव्या चिन्हासाठी काही पर्याय देऊ केले होते. पण आता निवडणूक आयोगाने या वादावर निर्णय दिला आहे. आयोगाने शिंदे गटाला ‘बाळासाहेबांची शिवसेना’ हे नाव दिले आहे. पण त्यांना हे नाव देताना त्यांच्या गटाला अद्याप कोणतेही राजकीय चिन्ह दिलेले नाही.
दरम्यान, एकनाथ शिंदे यांच्या गटाला नाव मिळाले असले तरी त्यांना कोणतेही चिन्ह मिळाले नसल्याने आता एकनाथ शिंदे कोणत्या चिन्हाचा प्रस्ताव आयोगाकडे देते आणि आयोग यावर काय निर्णय देते हे पाहणे महत्त्वाचे ठरणार आहे.