पुणे | भाजपने (BJP) देशातील 144 लोकसभा मतदारसंघांचा आढावा घेण्यास सुरुवात केली आहे. त्यासाठी पक्षातील ज्येष्ठ नेते, मंत्र्यांवर विविध मतदारसंघांची जबाबदारी सोपवण्यात आली आहे. त्यापैकी बारामती लोकसभा मतदारसंघ आहे. पण आता भाजपचाच मित्रपक्ष असलेल्या राष्ट्रीय समाज पक्षाकडून बारामती लोकसभेची निवडणूक लढवण्याची घोषणा केली आहे. याबाबतची माहिती प्रदेशाध्यक्ष काशीनाथ शेवते (Kashinath Shevate) यांनी दिली.
इंदापूर येथे आयोजित पक्षाच्या मेळाव्यात शेवते बोलत होते. ते म्हणाले, ‘सर्व कार्यकर्त्यांच्या आग्रहास्तव रासपच्या माध्यमातून आगामी लोकसभेला महादेव जानकर यांना उमेदवारी देऊन उभं करणार आहोत. कार्यकर्त्यांच्या जीवावर आणि संघटनेच्या जोरावर महादेव जानकर यांना बारामतीतून १०० टक्के निवडून आणणार, असल्याचे त्यांनी सांगितले. दरम्यान, बारामती हा लोकसभा मतदारसंघ राष्ट्रवादी काँग्रेसचा बालेकिल्ला म्हणून ओळखला जातो. सुप्रिया सुळे या मतदारसंघाचे प्रतिनिधित्त्व करत आहेत.
ज्या मतदारसंघात भाजपचा पराभव झाला त्या प्रत्येक मतदारसंघात भाजपकडून जोरदार मोर्चेबांधणी सुरु आहे. त्यापैकी बारामती हा मतदारसंघ आहे. या मतदारसंघाची जबाबदारी केंद्रीय अर्थमंत्री निर्मला सीतारमन यांच्याकडे सोपवण्यात आली आहे. त्यादृष्टीने रणनीति आखली जाणार असताना आता बारामती लोकसभेची निवडणूक महादेव जानकर हे लढवणार असल्याची घोषणा शेवते यांनी केल्याने भाजपची अडचण वाढेल, असा अंदाज व्यक्त केला जात आहे.
रासपचा मुख्यमंत्री होण्याकडे लक्ष
महादेव जानकर यांच्याकडून राज्यात सत्ता कशी येईल, याकडे लक्ष दिले जात आहे. त्यांनी माझ्या पक्षाचे आमदार कसे वाढतील आणि राष्ट्रीय समाज पक्षाचा मुख्यमंत्री कसा होईल, यासाठी माझा प्लॅन चाललेला आहे, असेही म्हटले होते.