मुंबई | अनेकदा आपण ऑनलाईन फूड ऑर्डर (Online Food) करतो. त्यानंतर मिळालेले पदार्थ चांगलेही असतात. पण मुंबईतील एका व्यक्तीला वेगळाच अनुभव आला आहे. त्याने जेव्हा डॉमिनोज पिझ्झा (Domino’s Pizza) ऑनलाईन ऑर्डर केला तेव्हा त्याला त्यामध्ये काचेचे छोटे तुकडे आढळले. त्यामुळे त्याने ट्विवरवरून फोटो पाठवत याची तक्रार केली. त्यानंतर डॉमिनोज कंपनीनेही त्याला लगेच उत्तर देत या प्रकरणाची चौकशी करण्याचे आश्वासन दिले.
मुंबईतील रहिवासी असलेल्या अरूण कोल्लुरी याने झोमॅटो या कंपनीच्या माध्यमातून डॉमिनोजचा पिझ्झा ऑनलाईन ऑर्डर केला होता. जेव्हा त्याने हा पिझ्झा खाण्यासाठी उघडला तेव्हा त्याला त्यामध्ये काचेचे छोटे तुकडे आढळले. त्यानंतर त्याने डॉमिनोज पिझ्झासह मुंबई पोलिसांना ट्विटरवर टॅग करत याची तक्रार केली. मुंबई पोलिसांनी डॉमिनोजच्या कस्टमर केअरशी संपर्क करण्याचा सल्ला दिला. तर पिझ्झा कंपनीने आम्ही ग्राहकाशी संपर्क केला आहे. याप्रकरणाच्या चौकशीचे आदेश दिले आहेत. त्या पिझ्झाचे नमुने मिळाल्यानंतर पुढील कारवाई करण्यात येईल, असे सांगितले आहे.
तसेच आमच्या क्वालिटी टीमने पिझ्झा आउटलेटची तपासणीही केली आहे. मात्र, यामध्ये कोणत्याही प्रकारची त्रुटी जाणवली नाही. झोमॅटोनेही याची गंभीर दखल घेतली असून, ग्राहकाशी लवकरात लवकर संपर्क साधला जाईल, असे सांगितले आहे.